Plantun de Prouvènço

Pèr coumpara dos planto d'encò nostre

Monotropa hypopitys & Panicum barbipulvinatum

Monotropa hypopitys

Ericaceae

Nom en français : Monotrope sucepin.

Descripcioun :
Lou suço-pin trachis en pichòti mato dins li bos, majamen souto li pin e li sapiniero de mountagno. Es uno planto sènso clouroufilo (parasito de champignoun -mico-eterotrofo-), jaunasso, que se roump eisa e clinado à la flourido (se redrèisso après). Fai de 3 à 12 flour blanco en campano.

Usanço :
Lis indian d'Americo l'utilison contro lou tussi. Escriéure au site se n'en sabès mai.

Port : Erbo
Taio : 5 à 30 cm
Fueio : alterno
Tipe bioulougico : Geoufite
Cicle bioulougico : Planto renadivo

Gènre : Monotropa
Famiho : Ericaceae

Ordre : Ericales

Coulour de la flour : Blanco
Petalo : 4
Ø (o loungour) flour : 1 à 1,5 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Jun à avoust

Liò : Pinedo - Sapiniero
Estànci : Termoumediterran à Mountagnard
Couroulougi : Bourealo
Ref. sc. : Monotropa hypopitys L., 1753

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.